蘿蔔青菜 各有所愛
今晚歐冠盃決賽上演馬德里內訌,這世紀大戰一場過,本地球迷又有咩睇法?
勝負繫於心理質素
馬德里兩支冠軍級球隊對碰,澳門五人足球代表隊教練官文豪認為心理質素影響頗大:“一場過的決賽,心理質素極有可能決定哪隊奪冠。雖然馬體會剛獲聯賽冠軍,但皇馬亦是今季西班牙盃冠軍,證明身為勁旅的實力,盃賽應付能力似乎較對方出色。”官文豪認為傷患亦是變數:“各方消息指C朗趕及復出,馬體會的迪亞高哥斯達可能缺陣,兩位球隊進攻主力,一個復出、一個或許缺陣,將帶來關鍵性的影響,所以我較為支持皇馬。”
最好加時踢十二碼
本澳拳手吳國權亦是睇波之人,目前要備戰月尾一戰早睡早起,今場冇得睇都希望兩隊踢好波:“我骨子裡係支持皇馬,但今季馬體會表現得好好,佢哋值得攞呢個冠軍。雖然迪亞高哥斯達傷咗未知踢唔踢到,但大衛維拉今季轉到馬體會表現好咗好多,鋒線唔太擔心。我最希望今場踢到二比二,有多入波之餘,又可以打到加時,最好就踢埋十二碼分勝負,因為咁先夠緊張刺激,兩隊波當然實力緊湊先好睇啦!今場勝負關鍵應該係球員鬥心同臨場發揮,邊隊表現好啲基本贏硬。”
皇馬牌面優六四波
身為皇馬球迷的足球評述員袁家傑表示:“如果計牌面,皇馬略為佔優,今場預計六四波。馬體會上仗有迪亞高哥斯達同杜蘭齊齊傷出,今仗就算及時復出,都未必有態。馬體會最勁就係打防反,冇咗迪亞高哥斯達差好遠!相反皇馬的C朗一早就開始休息備戰歐冠,柏比就算未能復出都仲有華拿尼,不過阿朗素停賽會為皇馬帶來隱憂。我認為今場勝負關鍵在於中場,睇吓皇馬頂唔頂得順高基同加比兩名發電機,兩隊都擅長打防反,邊隊入波先一定有着數。”
冀馬體會創造奇蹟
足球先生梁嘉恆原來自幼就係馬體會球迷:“我好欣賞馬體會嘅踢法,細細個已好鍾意佢哋。今次當然支持馬體會,希望佢哋創造奇蹟,取得史上首個歐冠盃。雖然迪亞高哥斯達唔知能否上陣,但我相信球隊並唔係打死一個人,正如皇馬都唔係C朗一個踢。馬體會今季表現好好,佢哋值得攞呢個冠軍,加上失球係成個西甲最少,所以我相信佢哋可以贏出今場比賽。當然臨場發揮都好重要,但我無論點都支持馬體會喇!”
留言