巴塞讓半一趁“祖”
萬衆期待,今季歐冠盃終極一戰明晨在德國柏林展開激戰,祖雲達斯與巴塞羅那爭奪本季三冠王聲譽。連埋友誼賽雙方四次交手都係不分勝負,但最近一次係十年前嘅事。今時今日嘅巴塞被稱為地上最強,MSN攻擊組合更譽為史上最強,祖記要保住不敗身確實不易。
另一項有趣數據,巴塞近三場歐冠決賽取得全勝;祖記近三次殺到入決賽均鎩羽而歸,認真“大吉利市”。講實際巴塞明顯高於對手,否則初盤巴塞唔會讓半球/一球。一於捧巴塞法定時間內斬殺祖記。
意大利球隊一向畀人感覺都係防守出色,相信祖記今仗亦會先穩住防線,絕對唔會與巴塞鬥攻鬥搶。不過,祖記已經連續七場比賽有失球,以往穩健嘅防線似乎虛有其表,況且今場對住無堅不摧嘅最恐怖組合,祖記大門實在難保不失。
巴塞教頭安歴基在執教生涯終於得到第一個冠軍,跟住攞埋西班牙盃,現正向三冠王進發,呢個千載難逢機會又點可以錯過。美斯、牙擦蘇、尼馬,靠你哋啦!
推介:巴塞羅那2:1
足球評述員 Ben
留言