【陰公】話說今年不少老店做到意興闌珊，非為市道差左，而係負責查牌既民署搵番幾十年前舊則出來要求他們復原，又有多種新例要老店左改右改，改極都唔啱，就黎想執笠唔做。間選議員高開賢連續幾日係立法會力追這問題，指特色老店受到不少「刁難」，一時說不准明火煑食要改用電，但舊區根本電壓唔夠；有些店被人投訴油煙大，整好抽風之後又話噪音俾人投訴，質疑執法部門係咪想搞死老店，最後淨番大集團先有得做？ 
來到經財司範疇，高開賢繼續為老店請命，兼大吐中小企請人難的苦水，近來人資辦審批外勞收緊不少。司機不足已影響各行各業，但政府企硬不輸入外勞司機，他引述石油業界指，現時年紀最大的送貨司機已68歲，平均年齡50幾歲，希望政府鬆綁。財爺梁維特就澄清，今年新批外勞有多無少，截止10月有超過1.2萬，前兩年只有一萬左右，司機短缺的問題要等大專院校再研究 。另外，即將成立的社區經濟研究小組會邀請業界、專家和跨部門研究支援中小微企，當中亦包括公共行政的部分。經財司屬下亦已推出「送服務上門」，免小店要跑多個政府部門疲於奔命。 
可能星期一、二俾民署耍左兩日，高開賢屈左一肚火，聽罷差點拍檯大罵：「司長你唔好耍我！」他又質問，經濟委員會成立幾年？中間開過幾多次會？無論經委會還是社協聽左咁多意見，到最後都要政府拍板，否則再開多幾個委員會都無用。他又指失業率只有1.9%，政府應充分研究哪些行業人多、哪些行業人少，而非側埋一邊。