為保利達獻計：「海一居」一樓換一樓
【發財立品】收地死線在即， 星期六數百名「海一居」小業主到保利達公司抗議要求發展商交待，期間群情洶湧，有人一度衝入辦公室，到平台撒冥錢。交涉數月無效，有小業主怒稱被當成「馬騮」一樣拋來拋去，發展商只將責任推給政府。業主的恐慌和無助可想而知。財團有大把本錢、時間與政府打官司，唔打就輸梗，打仲可能有轉機，橫豎也是賭一鋪，對簿公堂的機會相當高。這筆爛帳一拖長，買家叫苦，賭大咗嘅炒家恐怕要嗌救命。
根據新《土地法》 ，未完成發展的土地必須收回，將來再批地一是公開競投，若為了公眾利益豁免拍賣必須經過公示程序，以往鬼鬼祟崇偷蕃薯的情況無咁容易過關，這亦是為何有人恨得牙癢癢，不斷嚷著要修法的原因。正正是新法生效，後門已上鎖，收地已是無可避免，否則正如特首之前所講「如果可以用行政程序解決已經解決咗」。 政府將於12月10日公佈解決方案，特首崔世安已明言有興訟的可能。
保利達係堂堂香港上市公司，主席柯為湘身兼澳區全國政協，為保商譽，也乃念係澳門賺咗唔少錢，自願賠償買家當然係最理想。如果唔想賠真金白銀也有一法，集團係黑沙環衛生中心旁邊擁有一塊近18,000平方米土地儲備(黑沙環填海區T+T1地段) ，大可同小業主一樓換一樓，這塊一線海景靚地皮根據批地合同要在2017年完成發展，否則到期又要收番。保利達早年承諾既紡織城根本無兌現，保利達花園、海明居、海天居白白賺咗澳門人土地，財團年年進帳過百億，如今獲利回吐，盡番少少社會責任都好應該，唔通又要搞到苦主上訪中央先安樂？
 
 
【‪#‎保利達地產王國‬】 海一居小業主集會一度與警員推撞 | TDM (新聞片) http://goo.gl/Sh85xA