【信口開河】叠石塘山超高樓涉嫌「大放水」，話說前日特首崔世安被追問會否引用《城規法》賦予的權力在「總體規劃」完成前凍結審批程序，崔世安答得相當爽快，指編制「總體規劃」的工作經已啟動，至於要凍結項目就推說「唔知法律上點樣操作」。現場記者聽到當場打個突，皆因從未見政府正式公佈過，後來經查證特首所言非虛！佢真係咩都唔知！
翻查《城規法》第17條，訂明編製城市規劃草案須由「特首批示決定」，並刊登《政府公報》作實。此後還有一大堆法定程序：向全民公示草圖、至少兩個月公眾諮詢，若有重大修訂，要重走一次程序，最後由特首簽批成為法定規劃。 安安誤將《土地法》當成是《城規法》，連啟動總規要自己批都唔知道，睇怕要搵人寫番本說明書俾佢。但實在令人有少少擔心，唔知安安成日掛係口邊、倒背如流嘅「依法辦事」，究竟係依咩法？
有城市規劃專業人士指出，特首對制訂總體規劃角色非常重要，由決定城市發展定位、產業佈局、各區居住人口分佈和配套社會設施等等，都要經跨部門協商，最後拍板上馬啟動規劃嘅係特首、簽字負責嘅都係特首。
總規影響澳門未來長遠發展，亦包括發展商最關心的敏感議題，例如：「白區」會否減少？各區樓宇建築高度限制、景觀控制會否再「加辣」，連一些原有的灰色位都無得走盞；部分地段的建築項目是否要先叫停，防止歷史、文化或自然景觀受到破壞，若已批出工程准照，修改規劃令發展商有損失，就可能涉及賠償問題。又如路環和各區山體究竟要開發還是保護？法定保護區範圍要劃到幾大？這亦是目前民間對超高樓的爭議點所在。
 
【‪#‎守護路環‬】 運用特首權力凍結超高樓？崔：唔知點操作 http://goo.gl/j5gGIP