南灣發展公司董事會主席華年達

間選議員歐安利
南灣湖CD區14幅土地將於本月底到期，運輸工務司司長羅立文早前受訪時指會依法收回土地。在南灣發展公司舉辦的研討會上，有傳媒問到南灣發展公司會否與政府「對簿公堂」時，董事會主席華年達指，投資者來澳投資，並非以打官司索償為目的，而是相信《基本法》的保障以及政府的體制，並希望發展土地。相比起投資者多年來的損失，賠償只佔一少部分，公司期望能夠繼續發展已投資的項目，「尋求賠償是最後一步。」
歐安利：踢波都有加時 補償損失時間才公平
有份出席研討會的法律界間選議員歐安利則以足球比賽為例子，「呢個月我差唔多晚晚都有睇歐洲國家盃，打場波係90分鐘，但係打打吓有球員傷咗，比賽停咗3、4分鐘，球證都會加時。加時係公平嘅，講到明一場波90分鐘，停咗1個字咪加返1個字。停幾多加幾多，呢個先係公平原則。」他相信承批人並非要求土地過期後，政府重新批地，而是希望當局補償因發展受阻及延誤所失去的時間，「個個都想公平，停咗幾多年，咪加返幾多年囉。」
歐安利亦指，新舊《土地法》在行文上有很大差別，「舊法無寫到咁絕，而係根據實際情況，只要承批人無錯，政府就可以打開門傾續期。但新法就鎖咗呢道門。」他更指，政府在新《土地法》立法時，已表明新法規管的是新批地，新法生效前的批地應由舊法規管，「南灣湖CD區究竟要跟邊條法律？肯定係通過《基本法》嗰時已經生效嘅舊《土地法》！無可能用之後嘅法律損害之前嘅權益。」