過夜價升到千萬?
莊思敏當睇笑話
莊思敏早前爆出被人“問價”,對方更肯出一百萬,日前對方更出到一千萬過夜價錢。前晚她受訪談起此事時,笑言只會當係笑話睇,因為唔信有咁大隻蛤乸隨街跳。
前晚,汪明荃、陳展鵬、胡定欣、傅嘉莉、洪永城、蔡思貝、林夏薇、莊思敏等齊為《保良善心全“鳳”獻》節目錄影。
近日有報道指有人向莊思敏“問價”,過夜價錢更由開始的一百萬,跳升至後來的一千萬。她笑言:“係呀,我為新戲謝票時,同場嘅林盛斌都有恭喜我,好似我真的已有一千萬落袋。其實邊度有咁大隻蛤乸隨街跳?完全冇可能,應該係個大騙局,因為騙徒嘅手法真係估佢唔到。不過,我咁精明,睇到對方嘅留言就狂笑,簡直當睇笑話。(如果下次對方開到一億天價呢?)一億?冥通銀行嗰啲呀?哈哈!”她又透露有朋友叫她“放蛇”,但她笑言沒有想過這樣做。
談到今年的工作,莊思敏表示離開蕭定一的公司後,回復自由身,上半年會為無線拍《溏心風暴3》,並有意自己開工作室接Job。
陳展鵬表示知道劉德華墮馬受傷,祝願他早日康復。他最近拍攝的古裝劇需要騎馬,笑言事先會和匹馬多些溝通。他又坦言自己騎術不精,如果真的不行,也不會勉強,寧願搵替身上陣。胡定欣最近拍攝《深宮計》,她表示動作戲由心悠負責,自己相對較輕鬆。
林夏薇近日被指停工一年陪老公,她馬上作出否認,她表示:“都唔知點解有呢單傳聞,可能大家想我快啲生BB,不過今年工作安排都好多。(會拍新劇?)暫時未,都要睇公司安排。(老公身邊是否好多花蝴蝶?)我真要為老公澄清,佢係個好負責任好照顧家庭的好男人。”
留言