祖記“勒”住贏
意甲今晚有祖雲達斯對巴勒莫,屬於強弱之戰。任何數據顯示,祖記似乎冇得輸。計往績,祖記近九次對賽全勝,總比數十八比○,巴勒莫入一球都難。
祖記今季聯賽主場十二戰全勝,入三十球僅失六球,主場勁到冇朋友。希古恩與文迪蘇傑屬世界級射手,攻力有保證。防線的捷連尼、列治史迪拿及邦路斯等都係國家級守將,加埋鋼門保方,簡直銅牆鐵壁,以巴勒莫場均入唔到一球的薄弱鋒力,幾難偷到雞。不過初盤祖記讓兩球/兩球半,要淨勝三球先有着數,確要三思。祖記下周歐冠作客波爾圖,今仗隨時見好就收。
巴勒莫目前排尾三,距離尾四的恩波里八分,護級形勢不妙,唯有垂死掙扎。今場對住勢力強大的祖記,相信會踢死守戰術,即使未能搶分,亦希望將失球減到最低,但求輸少當贏,不妨捧巴勒莫輸波贏盤。推介:祖雲達斯二比〇
足球評述員 Ben
留言