【本報訊】賭場要全面禁煙還是要設吸煙室爭議不斷。有博彩從業員稱,設吸煙室是雙贏方案,而「保住份工」較健康重要。
論壇滿座 撐吸煙室紙牌被棄一旁
澳門論壇昨探討控煙政策,罕有吸引大批支持和反對設吸煙室市民到場,有從業員、貴賓廳人士、博企公關等,坐滿五十個席位,連論壇常客也無位可坐只能站在一旁。
有人預先準備好一批嶄新的「黃底紅字」標語:「支持譚司長設吸煙!保就業!保經濟!保健康」、「支持政府以民為本設吸煙室」、「支持政府從善如流設吸煙室」等,但始終沒人拿取,全程被「棄」於現場的公園門外。
小城社福政策開支全靠賭客輸錢
有經營賭廳、在賭場全面禁煙法案上投下反對票的議員鄭安庭表示,目前本澳經濟陷於低谷,貴賓廳經營困難,若還全面禁煙,那還會有客來賭,「澳門八成博彩稅收,我哋靠住賭客輸錢嚟支撐住!不然澳門嘅教育、醫療、老人福利呢啲錢係邊度嚟?」。
對本澳要履行世衛控煙公約的全面禁煙要求,鄭安庭不以為然,批評有關公約並未考慮經濟發展倩況,而且部份參與國家的賭場亦非全面禁煙,本澳為何又要立即跟隨云云。
中介人:工聯若保證利益不受損就撐禁煙
台下的博彩中介人也附和道,新加坡、南韓、澳洲和美國等地方的賭場都只是設吸煙區、自由吸煙,「先進國家嘅莊荷唔係命,我哋係比人相對落後地方就要超前過佢哋?呢個係相當荒謬嘅事情」。
他強調,絕不可以讓少部份人綁架他們大部份人的利益,「利益一旦受損邊個去負責呀?係米工聯會保證我有返呢個收入、有返呢份工作?如果工聯會今日保證嘅話,我諗都唔諗即刻支持佢!」
員工:保住份工係最緊要
有貴賓廳的員工不諱言:「健康好重要!但一份收入穩定工作,去照顧家庭、安居樂業,對我嚟講更加重要!」她堅稱,在現時設吸煙室是雙贏方案,呼籲大家勿再爭拗,「我哋都想保住我哋工作」、「依家係保住份工係最緊要」。
也有從業員直言:「講真,澳門靠乜嘢黎支持住,大家心知肚明。第時執X晒啲賭場,冇嘢做,返轉頭想剪線頭都冇呀!因為工廠都冇埋!」
另據論盡媒體報導,有到場的從業員透露,是因公司要求員工出席「撐場」才來,公司會視為員工上了半日班,且要爭取舉手發言,並一定要支持設吸煙室。
留言