澳足備戰亞盃外圍賽
各地世界盃外圍賽進行得如火如荼,澳門雖冇份踢高級別賽事,不過仍密鑼緊鼓為亞洲盃準備。
今次澳足戰亞洲盃外圍賽,小組賽首戰先作客吉爾吉斯斯坦。對手實力佔優,不過澳足上下直言以贏波為目標,誓要踢出屬於澳門的足球,鬥心十足。
為準備大戰,澳足昨晚邀請港超球隊飛馬友賽,有波睇球迷當然高興,不過球迷亦有微言,指今場賽事雖僅為備戰熱身,但認為足總可以更早公佈,讓一班支持本地波的有心人入場支持。
回顧當日世界盃外圍賽,澳足主場對柬埔寨一戰,氹仔運動場氣氛熱烈,加上有電視直播,整體足球氛圍可算是近年最好,可惜之後的賽事難復盛況。直至去年團結盃賽事,雖然賽事地點遠在馬來西亞,不過一班力撐本地波的球迷,自發組織睇波團,租場收看網上直播,頗為難得。
本澳不乏撐本地波的球迷,能夠入場支持當然最好,但有時亦難免分身不暇。當然場場電視直播可能性不大,但現時科技發達,足總大可多做宣傳,又或在網上直播,加強澳門足球在社會的認知度,藉此提高澳門足球氛圍,一舉幾得。
賈大廚
留言