容祖兒遺珠變明珠
一而再證明,香港是奇蹟城市:半個月內,出現兩位奇女子。林鄭月娥再返灣仔某小學時,她將是香港政壇第一個女特首!繼而,容祖兒最近出現灣仔演藝學院時,當年落選的兒童合唱團團員,已躍為大中華樂壇歌后,演唱會場數最多,錄歌最多……舉手投足,粉絲都尖叫。祖兒笑說:“我在台上飮啖水都有歡呼聲,我以為只有小鳳姐先有咁嘅待遇。”
天后很任性,沒有金碧輝煌佈景、豪華衣飾,“My Secret Live”演唱會的重點,是唱冷門歌,講內心秘密。她尾場吐心聲:“許多朋友對我說,你呢個騷好唔似容祖兒……其實,我冇唔同,而家係成長版容祖兒,仍然好多甩漏,但學識咗打圓場,知道點收返個尾。但仍然好九唔搭八,但得體咗啲。多謝觀眾睇完整個騷後話我聽,好開心揾返個最想見嘅容祖兒。”
不是秘密的秘密,祖兒身邊有位天使。她說,媽咪比她在台上演出更累,“佢騷前騷後都冇同我講好多嘢,但等我返到屋企,會幫我精心準備宵夜,又準備一盤熱水浸住我晩晩着高踭鞋嘅腳。媽咪眞係最辛苦,因為佢同病魔已搏鬥咗幾年,每一日都好辛苦,但仍堅持嚟睇我,佢睇得好開心,我都好努力令佢睇得開心,希望以後每次演出,媽咪都睇到。”
成功人士背後要有個好媽媽,否則,十八年後也未必出到一位天后。“我出道時自薦兩間公司,都遭到拒絕。”容祖兒的起跑線,泥濘又坑窪,“還不止,我細細個已嚟過演藝學院,嗰時我面試香港兒童合唱團,當時我係沙田兒童合唱團團員,我唔甘心淨係喺沙田唱。我同王祖藍一齊嚟面試,結果佢入咗,我落選……點估到,廿幾年後今日,我嚟演藝開到十七場演唱會。多謝大家,將我由滄海遺珠變成掌上明珠。”
這個別開生面的演唱會,特設點唱環節,抽了幾首都是國語歌,“搞咩,今晚自由行之夜?”眞係極危險的,思覺也像失調,她喃喃兩句歌詞後,“導演叫我停,不符合規定,不是我的歌。不過,亦幾好聽嘅。”算是和應了男友劉浩龍的《思覺失調》。祖兒亦表示,“師兄”亦有到場支持,但不在幕前,而在後台。
高 梁
留言