波比再嚇粉絲一次

    據報道，無線福將“波比”歐陽震華又一次死過翻生，嚇粉絲一餐飽。烈日下拍外景，眼前一黑，中暑暈咗，倒地之際，張繼聰、邵美琪及時扶住，再次大難不死，果然有後福。

    “暈嗰時，感覺全身毛孔擴張，突然覺得好凍，行唔到兩步就暈咗。”波比經歷，大開耳界，酷熱中暑時，“會覺得好凍”。幸好附近有醫療室，毋須送醫院。“冇同老婆特登講，費事嚇親佢。”

    夜幕低垂，波比再返電視城，又好人一個。他回應記者關心，“冇咩大礙，我拍戲中暑都經常有，返到屋企沖咗個靚涼，過個冷河好好多，（有冇瞓陣？）冇特別休息，要睇劇本，唔使做咩！”

    頂硬上，“我入醫療室休息後見冇乜嘢，唔使入醫院，即返屋企休息。中間有場戲取消咗，夜晩要開工連戲。”盡顯專業精神——不怨天不尤人，不罵公司設備不周，不斥導演無人性，自己事自己孭。波比説，“天氣太熱，自己貪涼快，在冷氣房一出一入，身體一時不適應所致。”今回算是不幸中大幸。所謂外景，在電視城旁邊，若在荒郊野外，後果不堪設想。

    “我想同觀眾講，唔好再批評啲演員拍古裝戲點樣唔好。今次，我拍時裝戲都中暑，何況拍古裝，黐頭套又黐鬚，仲慘。各位體諒吓藝員辛酸啦。”歐陽震華是資深戲行前輩了，似言之差矣，竟自貶唔夠專業，冷天拍熱天戲，熱天拍冬天戲，乃家常便飯，甘之如飴，揮灑自如，演員、明星，特殊材料製成的。千萬不要祈求粉絲原諒，演技富魅力，大可提高片酬。某些正義人士，抱怨明星片酬太高，都黐線嘅，片酬不是老闆給的，觀眾歡天喜地奉上的。

    “今日好熱，戲服係冬季，所以，波比哥就喺大熱天時中暑。”及時扶實歐陽震華的張繼聰，回憶驚心動魄一剎，“我哋好擔心，見佢嘴唇白晒，所以大家都休息個幾鐘頭再拍返餘下戲份。所以，大家睇到幕前一秒鐘，演員同工作人員都付出好多，今日個個都係暴曬。”

    講句風涼話，年輕一輩有福了。拍電視廠景，無論何時都保持低溫，不是為人，是為了先進儀器。上世紀初影棚，鐵皮密封，上有烈日，內有幾千火射燈，汗流浹背，但拍攝不准汗流滿面。

    高  梁