皇馬祖記等捧盃
歐洲五大聯賽近尾聲,英超、德甲及法甲王者已定。上季幾乎要護級的車路士,今季由意大利戰術大師干地領軍下,提早重奪聯賽錦標,下季又再成“擂台躉”。德甲仍屬拜仁天下,連續五年封王,球會已表態下季繼續招兵買馬,睇怕都係誰與爭鋒。法甲摩納哥終吐氣揚眉,打破聖日門連續四年壟斷局面,相隔十七年再成法甲“一哥”。
至於西甲與意甲,雖然仲有些小變數,不過皇馬與祖雲達斯相信稱王只係時間問題。皇馬擊敗切爾達後,煞科對馬拉加祇要唔輸,就可壓倒巴塞重奪渴望已久的西甲冠軍,以其超班實力,對住無慾無求的馬拉加,皇馬若輸就認真“抵死”。
祖雲達斯同樣只差半步,下仗主場對尾三的克羅托內贏波即完成六連霸。咁啱得咁“翹”,皇馬與祖記捧完聯賽冠軍後,就要決一死戰爭做歐洲真正王者。
足球評述員 Ben
留言