李家鼎私房菜正式開張
李家鼎私房菜昨日在銅鑼灣開幕,作為總廚的鼎爺與兩個仔及新抱一齊現身迎賓,鼎爺紅顏知己亦有出現。開張儀式舉行前,鼎爺更追上潮流開通FB直播,大賣廣告。主持人笑言好多粉絲因為訂唔到位而鼓噪,鼎爺話:“唔好鼓噪,想食好嘢係要畀時間,心急呢就唔會有好收成。”
鼎爺透露前一晚已經同師傅們擬定了開張當日的宴客菜式,前菜有椰皇酸薑皮蛋、懷舊蜜汁叉燒、蚵仔卷同秘製醉鮑魚。主菜包括阿爺黃金蠔、椰皇燉嫩雞、荷葉龍盤鱔、阿爺乞兒雞、紫晶生炒骨、黃鱔焗飯及明目萬壽果糖水。試菜宴設兩圍,生意訂單不絕,已排到新年,鼎爺笑言預計兩個月冇假放,兼向電視台再請假。訂單多自然荷包脹,但鼎爺笑言:“未夠脹,我荷包如籃咁大,大過荷葉。”
凡事親力親為的鼎爺指獲人欣賞,唔可以瞞天過海走過場就算。又稱兩個仔如果想幫襯都一樣要排隊:“一視同仁!包括李師奶都一樣。”昨日鼎爺見到紅顏知己到場特別開懷,問到兩人可有註冊成婚?鼎爺稱:“我冇叫佢太太,嗌師奶咋!如果註冊後又搞第二個,咁註來做乜?拆樓都有份,我個人好公道,唔會搵人笨。”
留言