颱風「韋帕」雖然未有正面吹襲本澳,但最近距離在三百公里範圍內,氣象局在下午時份懸掛八號風球,打工仔紛紛下班,趕搭尾班車回家,駕車人士也一擁而至,交通擠塞,巴士站出現候車人龍,雖不至於秩序大亂,不過下雨關係,大家相當狼狽,爭先恐後上車。而民防中心在八號風球下墮即啟動,全程睇實個風和市況,應對可能出現的事故,且訊息一個接一個,將颱風期間本澳的實時情況,向市民大眾發送。
幸好今次風暴不算太惡劣,未有出現強風暴雨,破壞力有限。不過,唔知喺米風弱雨細,還是收唔到澳門訊息,大批旅客依然湧到澳門來,不少人為的是去賭場,風雨不改!的確有旅客詢問打風仲有無錢賭,淡定有錢淨,澳門賭場終年無休,打風也門常開。弊在巴士服務全線暫停,發財巴亦停駛,唯有搭的士,但可能新的士法生效關係,的士似乎唔敢趁風搵食,索性冚旗休息,的士都唔多部,結果人龍打蛇餅。
作為旅遊城市,真喺遊客至上,打大風都唔可以休息。何況港珠澳大橋能抵禦十六級颱風,無有怕,穿梭港澳口岸的金巴照常開,同樣地,大橋澳門口岸迫爆旅客,卻又無接駁巴士到市區。港珠澳同處珠三角,在區域發展之下,相互往來無間,惟三地天氣和政策始終有差異,結果出現上述狀況,澳門單方面也難以控制,只好配合,八號風球下加開特班車疏導旅客。看來三地不單要加強信息互通,還得在某些領域加強合作,政策措施相配合。
山草
留言