入紙紅館兩年未有期

    祖兒為霆鋒集氣

    容祖兒(Joey)紅館演唱會前晚係第十三場，當晚邀得謝霆鋒擔任嘉賓。霆鋒自爆入紙紅館兩年都被拒，等到頸都長！Joey為他即場“集氣”，笑言無論幾時大家都會等！

    祖兒的紅館騷每晚嘉賓環節都為粉絲帶來驚喜，前晚Joey在介紹嘉賓出場時，大讚對方是超級靚仔：“如果張敬軒係靚仔，佢係超級靚仔！佢平時好Chok，但係有一顆溫柔的心，因為我見證過！”Joey跟住唱出霆鋒經典歌《玉蝴蝶》，霆鋒便在舞台徐徐升上來，現場歡呼聲震爆紅館。

    兩人在台上擁抱後，Joey對霆鋒說：“大佬！阿仔點解咁耐唔見？是否在北京好忙？”霆鋒表示一直在香港拍戲，日前才飛到外地工作。Joey乘機說：“我以為你在北京過……你呢輪Dry唔Dry？”搞到霆鋒好尷尬。祖兒跟住表示好開心：“我視霆鋒係家人，當日邀請他做嘉賓，他一口答應呀！”霆鋒即說：“記得你搵我當日我病緊，我真係聽唔到你講乜，唔知講三個咩字，其實我係靠估。於是叫你唔好講嘢住，你要乜都得，唔緊要！剛剛話我特登回來撐你，其實大家都知唔止我一個，全行有好多人都會撐容祖兒，因為佢係一個抵撐嘅人！”Joey聞言感動得掩面想喊出來的模樣，開心地說：“謝霆鋒同我講呢啲嘢！”霆鋒說：“我好衰，唔值得撐的，我就唔撐口架啦。”

    Joey緊接着好興奮咁講：“我知，你個人夠真！我哋由細玩到大，你成功時我戥你開心，我成功時你戥我開心，歌都有得唱啦：你快樂所以我快樂！”霆鋒聽到Joey哼起王菲的歌，立時害羞得行開走近觀眾席，全場大笑。霆鋒笑問：“你幾時變到咁？”Joey得戚地笑道：“我幾時都係咁，喺一個開心有安全感的環境，我就係咁啦，哈哈。謝霆鋒一路好想繼續同大家開演唱會，你哋想唔想？”觀眾即刻起哄回答：“想！”

    霆鋒說：“話時話，紅館呢個空間，我入紙兩年，一次又一次被推翻，再推我就唔開啦。”Joey可能怕霆鋒說話太盡，即打圓場說：“鋒哥，千錯萬錯都係我錯，唔好咁講。你知唔知我呢個騷也申請咗好耐先有期？無論等到邊一日，今年又好、下年又好，總之大家都會等你啦，係咪？”觀眾報以歡呼聲和應。

    兩人之後再合唱《阿門》，邊唱邊同觀眾握手，期間Joey不停同觀眾講：“係咪好靚仔呢！不老的傳說呀，食咗防腐劑。”坦率得來十分搞笑。