為慶祝中華人民共和國成立七十周年和澳門特區成立廿周年,特區政府用咗一千五百萬元的預算經費,搞咗場一連兩日的巨獸大巡遊。由中國和法國團隊製造的大型機械裝置「龍馬」,首度現身澳門大街,不少龍的傳人都被呢隻龍頭馬身的「藝術」與「高科技」作品所吸引,巨獸出巡,擰吓個頭,噴兩吓火和霧,詐家依行幾吓,已教大批市民和旅客駐足圍觀,無不感到震撼,嘩!手機不停地拍攝,一秒都不能錯過。
事實上,這頭巨獸已是五年前的舊作,「龍馬」的誕生是為慶祝中法兩國建交五十周年,別具意義,亦曾先後在內地、加拿大、法國等地表演,但喺咪如報導所指獲得一致讚賞,筆者唔敢講。今次來到澳門,也受到不少市民歡迎,但亦有人認為不外如是,有網民更話唔識欣賞,甚至覺得核突,真喺各花入各眼,也難怪,好多人一眼望上去,就話好似將個動物外殼笠咗係架吊雞車上,咁何來藝術,何來科技?笑死人咩!
「龍馬」外殼是木製,如果是單純的木雕製品,藝術味或者會較重。為了要呈現神話般的巨獸,裡面安裝大量機械零件,甚麼熱電混合動力引擎,還要搵十五個穿上如動畫片製服的操作人員,坐在外面控制巨獸,看上去似足件大玩具甚搞笑。博物館啲假恐龍都會郁會叫,更加栩栩如生,唔識欣賞唔緊要,政府識欣賞已經足夠,呢場巡遊加埋其它陪襯表演,預算經費一千五百萬元。相比,千幾人參加的國際幻彩大巡遊都只喺用一千八百多萬元,大家可知貴在哪裡?
山草
留言