韓馬利感恩有個好老公
老公愛我有多深?韓馬利說:“生死與共!”去年八月,她患上腦膜炎,昏迷一周醒後,“每次食嘢都想喊,呑極呑唔到,老公好擔心我要插喉進食,猛勸我食少少粥水。個人好虛脫,老公拖住我行。半夜全身出汗顫抖,老公整晩幫我攝毛巾吸汗……老公說:情願我替你病。”
韓馬利受訪《舊日的足跡》節目,感恩上天賜她一個好老公!這段萬里一線牽的良緣,月老是三杯鮮奶——
Many姐自爆三十年前的浪漫史,“杜燕歌從澳洲返香港度假,參加藝人之家活動,我與他於酒店咖啡座閒聚。他竟然叫熱鮮奶,一連飲了三杯,這個牛奶仔好奇怪。”Many姐對他感興趣了,覺得他唔會口花花,好有內涵,唔煙唔酒,好乖好靜,鍾意佢了,互相寄信、錄音帶……
這段婚姻,由開玩笑開始的。杜燕歌哈哈大笑:“有一次,Many忽然致電給我,說要來澳洲玩,問我招唔招呼佢?我話冇問題。佢又話:‘如果我來澳洲嫁畀你呢?’我話:你夠膽嫁,我就夠膽娶。當時,大家只係講笑,結果變成眞!證明我哋心中都有對方。在澳洲,人人叫我杜老闆,到了香港,有人叫我韓先生。”原來,韓馬利未嫁已做了賢內助,“Mary在澳洲時,在我的餐館落手落腳咁幫我招呼人客,甚至幫我洗酒吧、洗廁所,一點明星架子都冇,我感激萬分!只係老婆太工作狂了,在香港時對我關注好少。”
“記得結婚十周年,我寫咗一首詩畀Mary,掛在牆上。”杜燕歌説:“我只希望佢讀懂我,陪我遊山玩水睇瀑布、種盆栽……”聽罷老公愛的宣言,Mary含情脈脈回應:“經歷了這場大病,老公畀我好大安全感,我希望佢——以後有甚麼需要都要講出口話畀我知,我一定會做。我一定要揭開你杜燕歌呢一本書……讀懂佢。”杜燕歌,北京出生,曾兼職無線普通話配音員,又經常在劇集演南來的燕趙大漢,是獨樹一幟的性格演員。
高梁
留言