鄺芷凡遊海洋公園盡興
休館多時的香港海洋公園日前終於重開,香港開電視四位藝員包括李尚正、鄺芷凡、盧頌恩和植詠珊等,昨日急不及待一齊入園玩個痛快。唔玩唔知真性情,原來最玩得的係外表柔弱的鄺芷凡。
鄺芷凡與李尚正、盧頌恩分別玩機動遊戲“翻天覆地”及“雷霆節拍”,鄺芷凡玩完又玩面不改容,更得戚地對住暈浪想作嘔的李尚正笑說:“後生,就係咁啦!阿正,乜你想嘔咩?”李尚正苦笑說:“可能我早餐食得太飽。”
植詠珊最唔玩得,她解釋說:“我好易頭暈,以前當了半年空姐就劈炮,亦因為易暈。我站着睇遊戲機係咁轉已經頭暈啦,要我坐上去的話,真係咪搞。”
玩完機動遊戲,一行四人參觀北極館及欣賞斑海豹。原來每隻斑海豹都有名字,懂得聽飼養員叫名。無厘頭唔正經的李尚正即時向斑海豹大叫盧頌恩的暱稱:“妹頭!”令盧頌恩為之氣結。
留言