蕭正楠在《一笑渡凡間》中飾演濟公，他更為角色不惜剃腳毛。

無綫古裝新劇《一笑渡凡間》昨晚（24日）首播，劇集由蕭正楠（阿蕭）與湯洛雯（靚湯）主演，一個飾演失憶濟公；另一個飾演神武女捕快，兩人將會在劇中化身歡喜冤家合力查案，過程中鬧出不少笑話！阿蕭更自爆今次會為濟公的角色不惜剃掉腳毛，慶幸他大讚出來的畫面好彩夠靚，「犧牲」得有價值。由於拍攝此劇時，剛好爆出女主角靚湯與馬國明的戀情，阿蕭重提此事時，覺得能夠見證一段戀情誕生，替二人感到高興！（文：黎永樂　圖：相關機構）

無綫曾於90年代拍攝過《濟公》一劇，找來當時的小生梁榮忠夥拍梁小冰主演；而今次的《一笑渡凡間》即是濟公成佛的前傳故事。故事主要講述相傳佛祖座下大鵬鳥私下凡間作惡，於是佛祖派遣使者追捕，與大鵬鳥展開慘烈惡鬥；500年後，一名男子負傷倒臥荒野，被小鎮繡莊女工陸菁兒（簡淑兒飾演）救回，自此當上繡莊與染坊的小工。男子夢中巧遇高僧慧遠，解開身世之謎，記起本名為李修緣（蕭正楠飾演）。修緣跟女捕快蘇柔（湯洛雯飾演）成為冤家，二人在連番鬥氣中暗生情愫。後來小鎮陷入黑妖危機，修緣決意放下情愛俗念，拯救蒼生。

戲外做月老撮合戀情

對於今次演濟公，阿蕭坦言為演好角色，不介意剃光腳毛。他說：「濟公出場就好似瑪麗蓮夢露畀風吹起條裙咁，為咗騷美腿呢場戲，我將僅餘嘅腳毛都剃晒，不過，出嚟嘅效果又真係飲得杯落嘅！」他又表示對手靚湯經常在劇中受傷，所以成日要孭起對方，幸好對方都會體貼「慰問」一下：「辛苦你喇！陣間實壓死你！」不過阿蕭覺得靚湯沒有比想像中重。同時拍攝此劇期間，阿蕭有如「明湯戀」的月老一樣，感覺似撮合二人的戀情：「好記得馬國明嗰陣成日嚟搵我飲咖啡，雖然依家知道佢唔係真心，佢亦唔再喺我身邊出現，但親眼目睹佢哋走出人生一條感情路，都戥佢哋開心，哈哈！」

拍動作戲拗柴勁論盡

至於靚湯飾演打得又睇得的女捕快，劇中展現英明神武、身手不凡的一面，其實她拍動作戲時經常拗柴，十分論盡！她笑謂自己可以叫「玻璃湯」：「唔知點解成日拗柴，大家成日提我小心。」她又指自己被監製嫌演得太過麻甩，她笑說：「戲中係男人婆，連戲外都變到麻甩佬咁。」今次古裝劇不幸撞正夏天拍攝，著住厚服認真辛苦，但靚湯揚言很享受整個過程，大讚劇本和拍檔一流，是她拍得超開心的劇集作品之一。

蔣家旻多謝阿蕭搞氣氛

今次亦是沈震軒離巢無綫三年後的回歸之作，他將在劇中被蔣家旻主動力追，女方更會施展姣功俘虜對方的心。蔣家旻說：「我一向都係做正經啲嘅角色，所以今次拍喜劇好開心，希望將來有多啲機會。」她指拍攝期間相當辛苦，又熱又多蚊，她多謝阿蕭非常識做引大家發笑，令辛苦時間快些過：「第二次同佢合作，上次拍《十二傳說》，佢個角色好多對白要記，冇時間講笑，今次就唔同，原來佢好有幽默感，我直情想幫佢出本蕭正楠語錄，將佢啲Gag結集成書！」

蔣家旻表示拍喜劇十分開心，希望將來有更多機會。

今次是沈震軒離巢無綫三年後的回歸之作。

劇中會加入不少查案的元素。

蕭正楠在劇中與湯洛雯暗生情愫，但現實中他見證對方與馬國明（下圖）相戀。