日頭猛做，以為可以輕鬆吓，食過晚飯，息都無得休吓，大家相聚，政府有好節目，日以繼夜，夜以繼日，我哋齊齊來驗吓！全民核檢，等的等，做的做，不分時段，不分時間，預約都要等幾粒鐘，如奧運選手，情緒高漲，為的要創造佳績，打破紀錄，配合政府三天內完成全民檢測。衛生局曾說過有晒預案，最緊急時可設三十個採樣點，二十四小時運作，四天內包搞掂。現時加到四十二個檢測站，三天內完成，絕對無可能，但就覺都無得瞓！
市民等上三、四粒鐘，前線直踩多少個鐘，查實怨言唔算多，或者敢怒不敢言。市民檢測求安心，又怕黃碼阻出行，通宵陪你癲梗喺有原因，奈何安排就失禮死人。好天曬，落雨淋，保持一米距離喺呃人。排隊是常態，無話可說。不過連隊都唔分就好奇怪，居民、外僱擁作一堆，公公婆婆要擔凳仔，似足去輪米，還安排院友大軍「插隊」，唔嘈就有鬼。有需要者優先，其實好正常，只要安排妥當，特設專道，大家都好。
接種疫苗都可以提供外展服務，檢測何解唔照樣做，搞到周圍都喺人，對防疫又有咩好處？防疫措施永遠趕不及疫情變化之快，全民核檢一樣道理，疫情自爆發至今已一年半有多，全民核檢成效如何，大家好清楚，唔喺即驗即有結果，三天變化已經很多，要是追蹤精準，排查有效，漁翁撒網只是多此一舉，也是對本身防控工作不夠信心的表現。全民檢測唔能夠一次搞掂，恐怕市民唔會再有太多耐性繼續配合。
山草