譚俊彥否認靠父蔭

媒體

分類

新聞

《換命眞相》後緊接有《拳王》，擔演兩齣台慶劇的譚俊彥，聲勢浩大，衝擊視帝寶座。他卻睇好馬國明再封帝，“我有睇佢演醫生，覺得佢上次攞咗視帝後，整個人更多自信，佢已喺我前面，輸畀馬明，理所當然。”

“我冇信心，唔代表唔勤力去做。”譚俊彥大顯專業本色，“無論係咪台慶劇，我都搏到盡。”挾着兩劇聲勢，呼聲也高，若失落奬項會失望嗎？“唔會，改變唔到嘅事實，我唔會令自己唔開心；但要向前行，當下仍會緊張。咁多年來嘅頒奬禮，大家都明啦。”

別人視獲奬為成就、藝術地位的肯定，譚俊彥則只求工作穩定，可以肩負養家重擔，情願自己辛苦，“有得搏就要去搏。到你五十歲以上，可能選擇機會降低。問我想唔想攞奬？想！但更想搵多啲錢，供兩隻馬騮讀書。”

父愛泛濫的譚俊彥，亦談到他的星爸狄龍。譚俊彥在TVB六年，早已當上男一。“全世界都覺得阿爸幫我，先有得做男一。如果阿爸係TVB、卲氏高層，就另作別論；但我阿爸冇公司冇衣缽要我繼承。多年來，我只係演員，我繼承咗阿爸嘅專業精神、拍戲態度、待人處世……”

“機會是要靠自己爭取的，入行幾年，拍戲充滿辛酸。”譚俊彥揭開明星背後苦況：“有場戲要撼頭落地，導致額頭損傷出血，卻遭旁人冷嘲熱諷，‘咁搏做咩？TVB啲劇唔使咁樣。’後來先知，當年性格率直惹人憎，但原來自己努力係有人賞識的。”

直到現在，譚俊彥仍然率直，不怕惹人憎，他說《換命眞相》衆多對手中，對演情侶的鄧佩儀“無從入手”。感覺她太有自己一套想法，常用自己角度出發。“我成日都調教佢，角色就係角色，唔好帶私人感情。但佢到尾段先開竅，激死我！”

譚俊彥談到夫妻相處之道，“我對太太，唔會花言巧語，喺佢生日或紀念日都有送禮物畀佢，但我反對整心形牛扒，又貴又唔好食，會揀炒飯。”

高梁