澳門大型集體運輸系統輕軌,繼氹仔線後其它路線相繼動工,而公帑的投入也愈來愈大。造價逾百億元的氹仔線早已嚇壞人,不過,運輸工務司司長強調實際所投入的金額比之前預算為少。言下之意,司長可能覺得預算控制得唔錯!然而,輕軌氹仔線原本估算不過是幾十億元,結果工程超支超時嚴重,為社會垢病。往事如煙,大抵臨危受命的司長不會太在意,自接掌後致力推動運輸工務範疇各項工作,每到立法會開口埋口好忙,唔夠時間,保證唔到,可見費盡心力。
接下來,正在動工中的媽閣線、橫琴延伸線及石排灣線,各線造價估算由三十億元至五十億元之間,實際投放是未知數。媽閣線在西灣大橋基礎上改裝而成,就是多了個較大型媽閣站,橫琴線以高架橋加河底隧道形式建造,石排灣線則純為高架橋,三條線加起來總長度只有長九點三公里的氹仔線一半多啲,但造價要比氹仔線為貴。司長話大部份相關工程經判給後,掌握更多訊息,錯誤機會較少,相信三條線到營運時唔會超過一百二十五億元。這不是少數目,但願如司長所言。
至於氹仔東線初步設計中,長度拍得住氹仔線,超過七點五公里。現時未有預算也冇估算,皆因司長都唔敢亂估,做錯又被人鬧超支就無癮啦,等判晒咪知有幾貴囉!按橫琴線僅內地一端屬河底隧道,但造價高於媽閣及石排灣線。而東線全程走地下,其造價之大,不用言喻。輕軌至此,無三、四百億元應該走唔甩。以上線段通車是好幾年後的事,屆時能否做到快捷出行,本澳交通又會出現什麼變化?套用司長常言,既難估計又難保證。
山草
估唔到又唔保證
留言