張敬軒的《張敬軒The Next 20 Hins演唱會》補場演出正在舉行中,不少藝人都前來捧場,軒仔感激觀眾即時在疫情期間都堅決不退票,所以每晚都因觀眾反應熱烈而Encore多次。今日(19日)他在社交平台上載了昨晚一場的不少相片。
軒公表示為答謝大家,每場都要當尾場來演出。他又透露作〈笑忘書〉時抑鬱症最嚴重,他指當時工作量不多,家裡亦有點狀況。他憶述:「今日都唔知道聽日會發生乜事,甚至乎唔知自己重想唔想行落去。坦白講,唔係冇過輕生念頭,但我個膊頭實在太重,我重有爸爸媽媽、有屋企、同埋我重有我嘅歌迷。」他又感謝大家一直對他的支持。
軒公不單穿起他的「白花油戰衣」舉機拍攝現場熱鬧氣氛,他留言指自己今次不做導演,要做他的強項「磨del」(Model)。但見他上載的相片都是唱得肉緊地擠眼嗡鼻,又有瞪眼傻笑相,難得他不介懷,還幽自己一默。
軒公留言:「將我啲頭痛、牙痛、頸痛及腰痛,影到清楚到我自己都尷尬起上嚟。不過我聽過一句名言,只要自己唔尷尬,尷尬嘅就係人哋,你睇下你哋睇到幾咁尷尬。」 (編輯:游子欣)
留言