疫情清零機會來了,特區政府把握抗疫時機,結束兩週的相對靜止期,繼而推進至鞏固期,來個大測試。試吓將限制稍作放鬆,測吓疫情會否反彈。未來一週,防疫部門繼續大玩平衡的藝術,有限度放寬工商場所營運,賭場在遵守防疫指引下,終於可以再次迎賓,其它娛樂消遣還未可行。怕的是餐聽食肆太多人,所以只供外賣,堂食繼續免問。取消乘搭巴士特許證,卻又認為打工仔最好自駕上班。返工出入,公交優先,頓成廢話!
可以返工,但同一時間內,最多五成員工上班。換言之,一人半更,有工開一半,有飯分開食,還要做到單獨空間下進食。場所可以營運,距離要保持一定,口罩續用標準型,慎防疫情反彈,清唔到尾。如此細緻的指引,比起分區分級精準防控,更叫人拍案叫絕。特定人群就要每日一檢,上班族也要兩天一檢,可以在家工作就免檢。
未來一個星期唔使全民核檢,但自我快測得日日呈報。閒時無嘢做,畀你落街散個步,帶埋條狗都無人嘈。不過戴住口罩跑步就唔好,怕你身體應付唔到。逛街仲離譄,絕對唔喺豁免這條路。散步同逛街一樣喺行路,但要分清當局這一套。既然解封,相信大把人會落街「散步」,最緊要唔好亂七八糟,即使批示唔喺為咗罰人,但睇清楚至好。“剪不斷理還亂”實在有道理,將這句話套用到防疫工作上,精闢不過。
山草
留言