張敬軒帶病唱完全場

    狂歌熱舞的演唱會，張敬軒“猝病”台上，聲沙，自言頭重發熱，不舒服……翌日，“英皇”宣佈，餘下五場延後，咦——點解唔係六場？帶病演出那場，理應要補飛的，有“歷史案例”可援——

    天后之天后，小鳳姐唱《順流逆流》，唱到氣咳，她掩口大叫“停！舞台煙花吹過來，嗆着喉嚨，我再唱唔落去，好影響水準，既然歌迷得不到最完美享受，今場到此為止，散場。”嘩聲四起，已過了半場，咁即係點呀？“保留今晚票尾，再選日子開專場補償大家。保證各位看到最完美的徐小鳳…… ”咳一聲，條氣未順，全場表演作廢，擇日補償；一張飛看完半場再來一場……歌迷井然默默離場，不少繞道台前，向小鳳姐招手，聲聲珍重。

    舞台許多猝然意外，墮屏、甩咪、墮地洞、水裡火裡跌倒，裙拉褲甩爆呔……防不勝防。藝人道德基本一條：Show Must Go On!

    此乃藝訓班的ABC。天王、天后須堅持至高水準、完美無暇的藝術，不容許自己有甩漏的。被煙火薰到輕咳一聲，即時叫停，另開專場補償，小鳳姐何等天后台型。

    天王級台型的張學友，演唱會開場前的五時許，後台猝然開記招，“今晚演唱取消”驚愕未止，“今後幾場亦延期……”甚麼天大事件？“我有小小感冒，影響聲線……”唔覺噃，他回應群記皺眉：“我自己覺。要將最完美藝術獻給歌迷。”借助音響、燈光、特效，跟歌迷講吓笑，也可以側側膊唔多覺的，“你唔覺我自己覺，至高票價，目的享受至高藝術。”有此執着，小鳳、學友逢演加場又加場，去到邊滿到邊，帝后出品，絕不欺場。

    頭重發燒、聲沙，張敬軒猝病台上，當晩，他堅持到最後的。第三次“安歌”之際，台前勸止歌迷：“你哋唔好行埋來，我唔收得你哋禮物㗎，我冇戴口罩，請大家返去為我祈禱，我有做快測，上半場仲係一條線。下半場，我一路飊冷汗，請你哋集氣幫我，叫張敬軒唔好病啦！”不料，一語成讖，翌日宣佈中招，無奈暫停演出——當晩是病中演出的，聲沙頭重，歌迷也看到第三次“安歌”的，看完全場了。

    高  梁