羅啓豪開騷天價票秒殺

    天佑歌壇！《中年好聲音》季軍，羅啓豪“初出茅廬”第一次開演唱會，最高VIP票價二千八百元……歌迷驚魂未定，羅啓豪宣佈，四十個VIP名額，每張訂單限購兩張，八十八秒內全部售罄……

    “唔好話二千八百元，跟着的五百八十至八百八十元門票，邊値得呢個價錢呢？當自己大明星咩。”初生之犢，與巨星等價齊觀了。張學友、許冠傑、陳奕迅，亦這個價錢……

    定價之高，售罄之速，羅啓豪自己也大吃一驚，於網站坦言：“歌迷會傳來這個消息，可以話，係今年好多難以置信的消息裡面之最。我平時自己睇演唱會都唔捨得用咁多錢買飛，冇諗過有人會毫不考慮攞咁多錢出嚟聽我唱歌。所以，我會把握每一分每一秒去預備好呢個音樂會。”

    《中年》季軍，羅啓豪初試啼聲，能有“巨星身價” ，自己也感愕然。推測主辦當局看準風勢，扯盡去到盡：《中年好聲音》三甲不入的龍婷，今年五月參與《星夢交響慈善音樂會》演出，門票售價：九百八、五百八、三百八。不少網民都指龍婷“紅咗”，未決賽已經宣佈開音樂會，質疑她是《中年好聲音》的內定冠軍。不料，三甲不入，“最受歡迎歌手”的附屬奬品而已。在此岔開一筆，粵劇名伶“牛榮”麥炳榮，《鳳閣恩仇未了情》唱遍國際，他授徒有金句：畀心機學嘢，畀心機練嘢……乜嘢叫紅？不是新聞多，係要有料。觀衆肯出錢來睇你，叫紅；票價越高你越紅……藝術！藝術！不是各説各話， 牛榮一語，依據市場價値，可以評定藝術水平的。

    羅啓豪別具天賦，他出賽《中年》時選唱甄妮歌曲《奮鬥》，奪八十一分。車婉婉待他一唱完，即問：“媽媽有冇同你補習呀？”揭開了羅啓豪的媽咪大有來頭。劉英！十五歲參加業餘歌賽奪冠，成為酒店常駐歌手，常與國際走埠歌星同場……曾為TVB前領導人“六嬸”方逸華的音樂節目擔任嘉賓……因家風保守，移民美國……三個孩子長大，劉英於二〇〇六年重返歌壇，與朋友組歌唱團。不久前，還為陳奕迅的《盲婚啞嫁》MV唱歌……在歌星肚裡成胎，飮着音樂奶水長大的羅啓豪，一個願望：繼承媽媽的歌星夢！

    高  梁