捧費倫拉素場

媒體

分類

新聞

今晚只有兩場意甲夠睇頭，一次過推介畀大家，不妨整條二串一，費倫天拿贏搭拉素和，都幾有分頭。

先講費倫天拿對維羅納，睇好費倫天拿贏波有兩大原因：第一，佔有天時地利人和，雖然主場戰績並非超突出，但始終佔到一定優勢，加上維羅納六場聯賽作客只得一勝一和四負，踢客場完全冇料到。

第二，講球員名氣級數，費倫天拿陣中擁有唔少國腳級球星，至於維羅納，卅六歲嘅過氣射手盧卡東尼可能係最有“朵”。但話時話，睇好費倫天拿贏波，唔代表贏盤，初盤要讓到一球／球半，大家自己諗。

第二場拉素對拿坡里，拉素呢班波真係唔易應付，粗俗點講句，咬個頭又硬，咬個“籮友”又臭，有時踢到龍飛鳳舞，有時冇晒料到；只不過，對住強隊經常踢出加一波，今仗對住呢期缺態嘅拿坡里，隨時又踢出佳作。

連埋歐冠盃，拿坡里遭遇三連敗，係開季以來嘅最差時期，球員狀態，球隊士氣都有問題，聯賽已經再輸唔起，歐冠殺入十六強又只有一絲希望，拿坡里的確心事重重，初盤仲要讓拉素平手／半球，想贏盤，當然揀拉素。

推介：費倫天拿2：1；

拉素1：1

足球評述員Ben