“兵”“車”賽後評
昨晨捱眼瞓,睇咗場緊張而不精彩大戰,阿仙奴對車路士,從場上形勢所見,和波的確相當合理,可惜兩隊冇波入,只能互交白卷。
唯一可觀之處係兩位大師級教頭鬥扭六壬,雙方為作出針對性踢法都絞咗唔少腦汁,基於球員要順從主帥部署原因,發揮自然會受到限制,踢得冇咁放嘅情況下,整場比賽確有些少悶場。
場波另一話題,就係球證執法水平。一場事關重大嘅榜首大戰,理應執法尺度比較嚴謹,可惜好多過激動作,呢位球證先生都係視而不見,見而不理。例如米基嘅掃堂腿、艾雲奴域嘅穿心腳,仲有艾郎藍斯嘅鬆月爭及華確特禁區內被踢跌等等,幾乎搞到雙方球員開大片。其實今季英超球證執法水準真係不敢恭維,差不多每場比賽都受到好多批評,但英超球證依然故我,仍然死不知錯。
德甲球證一向都有極高評價,但自從發生“鬼影變幻球”事件(網側入波誤判入球有效)後,德甲球證亦識得自我檢討,趁歇冬時間,拉大隊去西班牙嘅馬洛卡交流及溫故知新,希望將執法水平再度提高。唔知英格蘭嘅球證工會又點睇呢?
足球評述員 Ben
留言