吳鎮宇仔仔Feynman眼角受傷一事,已經同電視台圓滿解決。
曹格連日發多條微博否認兒子Joe係整傷Feynman嘅原兇。
早前,吳鎮宇仔仔Feynman拍攝內地真人節目《爸爸去哪兒2》眼角受傷,吳鎮宇受訪時一度掟咪怒斥電視台不負責任,其後事件得到圓滿解決。但另一位嘉賓曹格就因兒子Joe 被網民指係整傷Feynman嘅原兇,所以連日來發多條微博澄清,又話希望電視台同吳鎮宇還佢清白,仲話:「好人吳大哥你當,壞人小氣,沒肚量我當!」不過,佢就被網民狂插,最後仲無奈刪除咗晒啲微博。
吳鎮宇近日出席新片發布會,被問到有網友要搵出到底係邊個推Feynman導致佢受傷,鎮宇就話:「點解一定要交一個小朋友出嚟?」佢又大爆曹格一直透過微信搵佢,佢話:「但係我仲未知道應該點樣答佢,因為呢件事,其實……大家自己心裡有數,件事其實已經完結咗,係網絡暴力將佢推返出嚟。所以我覺得,微博應該實名制,咁樣大家都會少啲麻煩。」
留言