范冰冰成個頭瞓喺李晨膊頭上面。
范冰冰公開戀情後,同男友李晨一齊現身。
范冰冰喺微博正式公開同李晨拍拖,獲得唔少粉絲讚好。近日,佢哋就一齊去西藏出席慈善活動,除咗做嘢之外,佢哋都有四出觀光兼拍拖,有網民就發現佢哋去咗大昭寺,仲見到李晨幫范冰冰擔遮,夠晒細心。噚日,范冰冰就同李晨喺拉薩轉機去阿里地區,兩個人喺機上熟睡嘅樣一樣被網民影到,范冰冰成個頭瞓喺李晨膊頭上面,而且雙手緊握對方,真係羡煞旁人。
其實李晨同范冰冰嘅戀情公開後,外界反應好到不得之了,仲有內地遊艇集團話,會送上價值300萬人仔嘅遊艇作為佢哋嘅新婚禮物,相當豪氣。但李晨舊愛張馨予似乎就唔係咁Happy,佢早前喺微博嘅祝福被網民大插抽水之後。噚日,佢又再發文話:「我真的沒有高情商,我有很多缺點,我沒有完美的人格沒辦法連說話都天衣無縫。我知道以後的路不會好走,但我也沒有害怕過。我相信,失敗,會成為成功的一部分。」
留言