澳門本地原創音樂頒獎禮——第13屆《澳廣視至愛聽力》將於7月31日晚上8時於澳門文化中心隆重舉行頒獎音樂會，入圍的69首參賽歌將會競逐多個獎項。為了令各位更了解一眾本澳歌手和他們的候選作品，《力報》由即日起訪問各入圍歌手，大談他們歌曲的創作歷程！

自我介紹：
我叫祖絲，公司讚我人靚聲甜，所以簽我做歌手。之後羅嘉豪帶我做司儀，人哋又讚我係高貴優雅嘅司儀，搞到我臉都紅晒！

點解要聽你首歌？
由羅嘉豪創作嘅歌詞一針見血，加上呢首歌係我初嘗作曲嘅處女作。處女作好珍貴，求你聽下啦！

除咗唱歌，仲有乜嘢叻？
嗯……好多喎！要我答我驚講兩日都未講完！惟有隨便數一樣叻嘢啦！就係做司儀。

個人金句/座右銘？
機會是留給有準備的人。

最喜愛嘅一句/兩句歌詞？
為何不狠心一些待薄我，來吧一刀割斷別再拖。〈騙局〉

如果得獎，你有乜嘢想講？
我想多謝我嘅戰友羅嘉豪、AJ，佢哋令我喺音樂路上不孤單；多謝我家人同未婚夫嘅無限量支持；多謝粉絲對我音樂嘅喜愛。

自我介紹：
從小鍾意唱歌，細個有幻想過未來做各種職業嘅可能性，但從來冇諗過係歌手。呢幾年不斷去參加比賽突破自己，得到滿意嘅成績，然後成為歌手，絕對付出咗200%嘅汗水。

點解要聽你首歌？
首次同新加坡資深音樂人Kevin合作嘅作品，而家失戀要生要死嘅歌太多、太慘，所以想創作一首苦得嚟帶甘，甚至帶甜嘅作品。

除咗唱歌，仲有乜嘢叻？
懶床最叻，可以懶兩個鐘。

個人金句/座右銘？
只要你確信自己正確就去做。做咗有人話唔好，唔做都係有人話唔好。

最喜愛嘅一句/兩句歌詞？
亂世有各種繁華，夜晚未覺得可怕。〈小智慧〉

如果得獎，你有乜嘢想講？
除咗家人、朋友，一定要多謝公司上下，包括：歌手、同事、老闆，有佢哋嘅信任同支持，呢首作品先會誕生。

自我介紹：
嚟自澳門讚娛樂製作有限公司嘅創作型男歌手梁健邦。

點解要聽你首歌？
呢首歌有A段同B段，係兩種完全唔同嘅風格！用黑色搖滾嘅風格去表達一份泥足深陷嘅愛情，亦係我嘅一個故事……一份回憶。

除咗唱歌，仲有乜嘢叻？
講嘢！我可以一日講足24小時都唔怕攰！

個人金句/座右銘？
有啲事做咗未必有，但唔做就一定冇！

最喜愛嘅一句/兩句歌詞？
愛若難以放進手裡，何不將這雙手放進心裡。〈人來人往〉

如果得獎，你有乜嘢想講？
多謝一直支持我嘅朋友，多謝教我唱歌嘅老師，多謝我嘅家人，仲有多謝讚娛樂製作有限公司上上下下。最後仲要多謝TDM對我首歌嘅肯定。