吳卓羲話想先處理好家事,佢仲話爸爸會喺7月中出殯。
近年,吳卓羲主力喺內地拍劇。
近日,吳卓羲(Ron)暫停咗內地嘅拍劇工作,返香港專心為癌病過世嘅爸爸處理身後事。噚日,佢以一身黑色素服現身電視城為新劇配音。對於其他工作,Ron就話會暫時放低,想先處理好家事,佢仲話爸爸會喺7月中出殯。問到佢嘅心情嗰時,佢就話:「同爸爸感情好好,但冇辦法,都唔想佢咁辛苦,屋企人都好傷心。家族生意會交畀親戚打理,家姐同媽咪負責睇數,佢哋話自己唔係做生意嘅材料。」
Ron透露今次返TVB係為新劇《梟雄》配音,呢套劇預計會成為台慶劇。傳聞佢同TVB即將約滿,Ron就話已經同高層曾勵珍、樂易玲見過面,主要係傾續約嘅細節。Ron希望可以同時兼顧香港同內地嘅工作,佢話:「我有畀意見,佢哋都有提出要求,公司都有自己嘅立場,畀我出去就肯定無咁多時間喺公司,所以而家都仲協調緊。」
留言