澳門本地原創音樂頒獎禮——第13屆《澳廣視至愛聽力》將於7月31日晚上8時於澳門文化中心隆重舉行頒獎音樂會，入圍的69首參賽歌將會競逐多個獎項。為了令各位更了解一眾本澳歌手和他們的候選作品，《力報》由即日起訪問各入圍歌手，大談他們歌曲的創作歷程！

自我介紹：
大家好！我係Fion，今年第一年參加《澳廣視至愛聽力》，大家多數見到我做節目主持，唱歌應該比較陌生。希望可以憑呢個機會，等大家認識多方面嘅我。

點解要聽你首歌？
呢首歌係我人生第一首歌，內容係想對父親講嘅心底話。雖然喺唱功方面有待改善，但我喺歌曲演譯上用最真摯嘅感情唱出嚟，希望你會支持我啦！

除咗唱歌，仲有乜嘢叻？
除咗唱歌、彈鋼琴，其實我打排球都唔錯！唔信？得閒可以切磋下！

個人金句/座右銘？
無論遇到甚麼困難，都會堅持下去！

最喜愛嘅一句/兩句歌詞？
未來仍要笑著來面對。〈謝謝你〉

如果得獎，你有咩嘢想講？
無論得獎與否，我都好想多謝幫助同支持我嘅屋企人、朋友，因為有你哋無私嘅幫助，先令我有勇氣去追求夢想。

自我介紹：
印象中嘅沈柏彤係理性思考嘅主持人，認真地幽默；或者係一個掌握心理嘅市場推廣宣傳能手。 但其實我只係凡人一個，剩係想好好享受人生。

點解要聽你首歌？
首歌適合所有曾經認為自己係理性思考，理性面對生活，但原來都會被感性支配嘅人去聽。 因為呢首歌嘅詞曲，都係描述自以為理性嘅自己，喺感情入面不能自拔地失去理性思考嘅基本底線，逐漸被感情支配到筋疲力盡嘅地步！

除咗唱歌，仲有乜嘢叻？
搵又平又靚又好食嘅街坊美食！

個人金句/座右銘？
即使世界令你幾失望，都要盡力去令佢更美好！

最喜愛嘅一句/兩句歌詞？
有肥瘦才有形態，有善惡才有神態。〈勢不兩立〉

如果得獎，你有咩嘢想講？
我會喺台上面講：「多謝TDM！」跟住扮喊，扮唔記得要多謝邊個，跟住講一大堆冇人識嘅人名，跟住多謝阿媽生我出嚟！

自我介紹：
澳門本地樂隊The Marsh成立咗大約兩年，我哋鍾意玩好多唔同風格嘅音樂，例如：classicrock、brit pop。因為隊員性格各異，鍾意嘅音樂都好唔同，為咗滿足每個人，乜嘢風格都會試！

點解要聽你首歌？
集清新曲風與勵志感覺於一身，就係我哋對呢首歌嘅感覺。當中最特別嘅地方係結他嘅獨奏部分，由情緒比較低沉開始，慢慢走向全首歌嘅高潮，我哋對呢個編曲好滿意。

除咗唱歌，仲有乜嘢叻？
我哋都好鍾意打機！格鬥遊戲、角色扮演，乜類型都有，有時打機打到唔想夾band。

個人金句/座右銘？
邊個練嘢再遲到就請食飯！

最喜愛嘅一句/兩句歌詞？
I need to be myself, I can't be no one else.〈Supersonic〉

如果得獎，你有咩嘢想講？
多謝父母，多謝結他老師，多謝Band友，同埋鍾意或唔鍾意我哋音樂嘅人。