澳門本地原創音樂頒獎禮——第13屆《澳廣視至愛聽力》將於7月31日晚上8時於澳門文化中心隆重舉行頒獎音樂會，入圍的69首參賽歌將會競逐多個獎項。為了令各位更了解一眾本澳歌手和他們的候選作品，《力報》由即日起訪問各入圍歌手，大談他們歌曲的創作歷程！

自我介紹：
三人合稱「SP三子」！羅嘉豪：「唔使點介紹！一個字講哂：澳門全能藝人。」祖絲：「舞台上係人靚聲甜嘅歌手同司儀，私底下係口甜舌滑嘅男人婆，所以氹到唱片公司老闆暑假幫我出碟。」AJ：「全澳門最爛喊嘅男歌手，憑住一把靚聲，搏到唱片公司簽我，暑假又有份出碟。」

點解要聽你首歌？
咁多主辦單位搞活動都指定要我哋唱〈無極限〉炒熱氣氛，巴士廣告又日播夜播，你想唔聽都唔得啦！

除咗唱歌，仲有乜嘢叻？
「SP三子」睇得、唱得、Talk得、跳得，得咗！

個人金句/座右銘？
沒有不可能的任務。

最喜愛嘅一句/兩句歌詞？
無極限的我，天生本性似火。〈無極限〉

如果得獎，你有咩嘢想講？
多謝「SP三子」呢一年嘅互相陪伴同努力，多謝粉絲，多謝金沙中國贊助呢首歌同MV製作，我哋會繼續「無極限」去做音樂！

自我介紹：
我是一名創客，我知道「沒有最好的自己，只有更好的自己」這個道理。所以我總能積極地發揮創意。我喜歡大自然氣息。

點解要聽你首歌？
這首歌記錄了我這些年中，突然一刻的開悟，打開話不投機這種溝通障礙的方法居然被我發現了！旋律的配對非常吻合。

除咗唱歌，仲有乜嘢叻？
開解人，我認為自己比較善解人意，我想成為善於規劃人生的人，並協助別人將人生規劃得更理想，所以聆聽是我強項。

個人金句/座右銘？
路遙知馬力，日久見人心 。

最喜愛嘅一句/兩句歌詞？
別戀金鏤衣，惜取少年時。〈莫等待〉

如果得獎，你有咩嘢想講？
多謝TDM，多謝所有關愛我、願意對我缺點包容然後指教我，點明我無知之處又唔會鬧我、放棄我的人。

自我介紹：
憑〈曼陀羅〉奪得去年《澳廣視至愛聽力》至愛歌曲金獎。大頭係一個不斷求進步，勇於面對新挑戰，同時非常嚮往與不同音樂人、藝術家合作而擦出新火花嘅本地獨立歌手。

點解要聽你首歌？
每個人都會有寂寞嘅時候，喺下雨天聽呢首歌會特別有感覺。加上創作團隊非常強大，係一首非常高質素嘅歌！

除咗唱歌，仲有乜嘢叻？
講爛Gag！如果爛Gag有得唱，我諗會比講出嚟更爛。

個人金句/座右銘？
想做一件事就要盡全力，就算後悔都好，因為總好過連後悔嘅機會都冇。

最喜愛嘅一句/兩句歌詞？
天晴一樣寂寞，寂寞還要生活；沒空說寂寞，還有工作太多。〈下雨天特別容易寂寞〉

如果得獎，你有咩嘢想講？
希望澳門流行音樂更進三步，希望政府了解我哋點解要咁努力，其實想大家睇到澳門人做得到！