周星馳與導演徐克將聯手合作拍攝3D版《西遊．降魔篇2》。  

「周星馳貼吧」喺微博澄清，呼籲網民唔好上當。
周星馳（星爺）喺2013年自編自導嘅電影《西遊．降魔篇》 叫好又叫座，喺內地突破12億人仔嘅票房。今年年初，曾有傳星爺同導演徐克將會聯手合作拍攝3D版《西遊．降魔篇2》。近日，有傳電影將會喺8月開拍，投資超過四億，並預計喺2017年嘅賀歲檔期上映。星爺開戲，影迷當然開心，不過噚日網上就有人假冒係電影製作單位招聘演員，除咗靚女之外， 靚仔都唔放過！搞到「周星馳貼吧」要即時喺微博代為澄清，呼籲網民唔好上當。

據了解，《西遊．降魔篇2》除咗第一集原班人馬（舒淇、文章、黃渤）拍攝，仲搵咗內地當紅男星林更新、韓國男團EXO前成員吳亦凡，卡司強大，所以好多演員都想參與其中！有不法之徒就睇中咗呢點，假冒係電影製作單位招聘演員，仲話：「必須是帥哥美女讓人一看就會震驚的那種。」為免有網民被騙，「周星馳貼吧」就即時代為澄清：「籌備正在推進中，而星爺究竟以何種方式與徐克進行合作，也是未知指數。然而，總有居心叵測之人伺機以各種手段招搖撞騙！」