澳門本地原創音樂頒獎禮——第13屆《澳廣視至愛聽力》將於7月31日晚上8時於澳門文化中心隆重舉行頒獎音樂會,入圍的69首參賽歌將會競逐多個獎項。為了令各位更了解一眾本澳歌手和他們的候選作品,《力報》由即日起訪問各入圍歌手,大談他們歌曲的創作歷程!
自我介紹:
大家好,我係今年新人蘇紫玲。自細就鍾意唱歌嘅我,夢想係成為一位歌手。為咗成為歌手,所以經常參加澳門嘅歌唱比賽,終於被發掘成為歌手,開展我嘅音樂夢。
點解要聽你首歌?
〈翅膀〉係第一首屬於自己嘅歌,由澳門出色嘅音樂人蘇耀光監製。呢首歌記載咗我追夢嘅點滴,希望憑呢首歌,鼓勵大家勇敢追尋夢想。
除咗唱歌,仲有乜嘢叻?
我最叻就係「鬥瘦」!哈哈!因為天生食極都唔肥,所以著到最細碼嘅衫。
個人金句/座右銘?
夢想只是一個名詞,要想辦法把它變成動詞。
最喜愛嘅一句/兩句歌詞?
I believe can fly, I believe I can touch the sky.〈IBelieve I Can Fly〉
如果得獎,你有咩嘢想講?
多謝一路以嚟支持我,同埋鍾意〈翅膀〉嘅朋友,多謝公司Pride、作曲嘅蘇耀光、填詞嘅言永若、仲有老闆余宗軒、經理人Chao Wing嘅栽培。
自我介紹:
我係周家耀!除咗係一名歌手,亦係澳門樂隊Scamper嘅主音。好開心〈鎂光燈〉能夠入圍,今次係我第二次以個人身份參賽。
點解要聽你首歌?
首歌嘅曲、詞、編籌備咗一年,亦係首次喺編曲上面,由有經驗嘅音樂人一齊一點一滴整出嚟。以Rock同Cool Jazz兩種音樂混合,所以包含咗好多心血,係愈聽愈有味道同層次嘅作品。
除咗唱歌,仲有乜嘢叻?
夾Band、彈Guitar、足球、藍球。
個人金句/座右銘?
成功的背後,必定經受千瘡百孔。如未成功,必定是覺悟未夠。
最喜愛嘅一句/兩句歌詞?
在亮度主宰的時代,讓世界只存在黑與白怎麼會痛快?奇怪,你怎麼不明白。〈鎂光燈〉
如果得獎,你有咩嘢想講?
其實要多謝嘅有好多,除咗多謝公司EasyMusic每一位嘅支持,仲有一班天馬行空嘅音樂伙伴,當然亦要多謝家人、Fans、TDM!
自我介紹:
Hi!我係Bobby!而家係一名全職學生,其實大學畢業咗幾年,不過因為鍾意音樂,所以又再讀書,為將來嘅音樂路打好基礎。
點解要聽你首歌?
〈降落傘〉同三年前嘅〈滴滴答〉印證住我哋呢個合作班底,喺音樂路上嘅成長同進步。〈降落傘〉曲風清新、歌詞亦好有意境!你哋都一齊嚟聽呢首咁好聽嘅作品啦!
除咗唱歌,仲有乜嘢叻?
真係好難諗呀!如果要講,我諗係「返工」同沖咖啡啦!以前做過大型連鎖式咖啡店嘅經理,離職後有客人讚我沖嘅咖啡好好味。
個人金句/座右銘?
嗯……冇乜喎!簡單、快樂就夠啦!
最喜愛嘅一句/兩句歌詞?
誰是誰非哪用說起,可否擺脫理性的判決。〈你說〉
如果得獎,你有咩嘢想講?
多謝隊友子龍、阿泉同Joein!仲要多謝屋企人,放手畀我行音樂路!
留言