澳門本地原創音樂頒獎禮——第13屆《澳廣視至愛聽力》將於7月31日晚上8時於澳門文化中心隆重舉行頒獎音樂會,入圍的69首參賽歌將會競逐多個獎項。為了令各位更了解一眾本澳歌手和他們的候選作品,《力報》由即日起訪問各入圍歌手,大談他們歌曲的創作歷程!
自我介紹:
我今年剛滿30歲尚有夢想,自覺係未變成鹹魚嘅青年。而家喺創業路上戰鬥中,希望喺平凡嘅人生中闖出一點不平凡!
點解要聽你首歌?
因為你都係一個平凡人,哈哈!我參加過唔少歌唱比賽,唱過好多歌手嘅歌。作為歌手,最重要係擁有一首屬於自己主唱嘅原唱歌!呢首歌終於出現咗,唔係唔支持下我呀?
除咗唱歌,仲有乜嘢叻?
曲棍球、足球、羽毛球、小型賽車,雖然唔講得上勁,但樣樣運動都唔差。
個人金句/座右銘?
活在當下。
最喜愛嘅一句/兩句歌詞?
逆風的方向,更適合飛翔。〈倔強〉
如果得獎,你有咩嘢想講?
多謝TDM,多謝評審團,多謝作曲、作詞、編曲嘅Tomy,多謝監製曾慶欣,多謝屋企人,多謝聽過呢首歌嘅朋友!如果真係得獎,應該開心到乜都唔記得晒囉!
自我介紹:
曾經有一個傳說,話人去世後體重會失去21克,亦說明「貳拾壹克」就代表住靈魂嘅重量。
點解要聽你首歌?
因為呢首歌一聽就會想狂Loop,喺好頹廢嘅時候聽,可能會搵到一種曙光!
除咗唱歌,仲有乜嘢叻?
吹水,我哋成日吹水多過夾Band!
個人金句/座右銘?
點都好啦……
最喜愛嘅一句/兩句歌詞?
誰又期待活著不一樣,誰又能編寫得漂亮。〈日出後的憂傷〉
如果得獎,你有咩嘢想講?
估唔到我哋可以企喺呢到,阿媽!我得咗啦!多謝夢創,多謝幫過我哋、提點過我哋、Like過我哋專頁嘅各位!
自我介紹:
大家好,我哋係The Lighthouse!我哋有四名成員,成立咗半年。曲風主要係搖滾,但我哋會繼續探索!
點解要聽你首歌?
話晒〈Sleepless night〉呢首歌係我哋第一首原創歌,希望大家多啲支持本地音樂,唔好聽完就算,要留意多啲澳門音樂人嘅動態,睇住大家嘅作品慢慢成熟!
除咗唱歌,仲有乜嘢叻?
除咗唱歌、彈結他,真係無嘢叻。讀書叻算唔算?GPA都有二點幾。
個人金句/座右銘?
天下沒有免費的午餐,做事一定要付出!
最喜愛嘅一句/兩句歌詞?
與其苟延殘喘不如縱情燃燒吧!〈追夢赤子心〉
如果得獎,你有咩嘢想講?
多謝大家支持!請多啲支持本地音樂!多謝排長!多謝咁多位朋友同家人!最重要都係支持澳門本地音樂嘅朋友!
留言