彭于晏透過經理人公司否認與陳靜撻著嘅傳聞。
陳靜喺微博發文諷刺媒體想象力豐富。
噚日,台灣型男彭于晏被爆戀上香港(口靚)模陳靜(DaDa)。據台灣媒體報道,DaDa同彭于晏客串《12金鴨》認識,拍完戲後二人火速撻著,至今已經拍拖四個月!該報道仲指出,因為彭于晏手臂粗壯,好似大象個鼻咁溫暖,所以DaDa幫佢起咗個「大象」花名。近日,DaDa仲喺網上貼出兩張大象公仔相,咁啱彭于晏最近都喺Instagram貼過關於大象嘅相,所以懷疑兩人借「大象」網上傳情。
彭于晏同DaDa熱戀嘅消息傳出後,引起唔少粉絲好奇。對此,彭于晏嘅經理人公司就發表聲明話:「彭于晏並不認識陳靜,報道拼湊訊息刻意暗示兩人關係密切,此事已非一笑而過的娛樂八卦。已經發了律師信,請其他媒體轉載時務必盡到查證義務,以免被此錯誤新聞影響。」而陳靜亦喺微博發文回應話:「某些記者的幻想力真豐富,我病著也中槍。」
留言