澳門本地原創音樂頒獎禮——第13屆《澳廣視至愛聽力》將於7月31日晚上8時於澳門文化中心隆重舉行頒獎音樂會,入圍的69首參賽歌將會競逐多個獎項。為了令各位更了解一眾本澳歌手和他們的候選作品,《力報》由即日起訪問各入圍歌手,大談他們歌曲的創作歷程!
自我介紹:
我係禤泳倫,今年21歲,澳大中文系大三學生,棋人娛樂製作旗下歌手。我嘅性格比較文靜慢熱,但熟悉之後就會好健談。興趣係唱作、寫作同演戲。
點解要聽你首歌?
〈毛蟲物語〉同我以往嘅風格好唔同,以前唱嘅歌比較成熟,同我自己年齡唔係咁配合,呢首歌可以話係我重新出發,搵啱自己嘅歌路同想表達嘅態度。
除咗唱歌,仲有乜嘢叻?
除咗唱歌,我嘅專長係捲脷同埋彎手。
個人金句/座右銘?
留白是一種優雅。
最喜愛嘅一句/兩句歌詞?
從前的毛蟲,仍能找到愛不再瑟縮。〈毛蟲物語〉
如果得獎,你有咩嘢想講?
多謝作曲嘅Olivia、填詞嘅龍世傑、編曲嘅潘君保,同埋公司所有為〈毛蟲物語〉出過力嘅同事。所有投過呢首歌嘅朋友,仲有我嘅家人,多謝你哋!你哋係我堅持嘅動力。
自我介紹:
大家好,我係蘇耀光!係一位歌手、唱作人、音樂監製、演員、音樂公司老闆,仲係《力報》嘅粉絲(口添)!
點解要聽你首歌?
根據非正式統計,無論男女老少、阿叔阿嬸、老師學生、識唔識音樂嘅人都好,個個都話呢首歌好聽,唔信你聽下!
除咗唱歌,仲有乜嘢叻?
蘇耀光出咗名最叻係打機!特別係需要用腦、要Teamwork、考策略嘅遊戲。本人更加榮獲「棋人FIFA聯賽2015第一季度」第一名同MVP等殊榮。
個人金句/座右銘?
做人低調啲好,唔通我勁又話你知咩!
最喜愛嘅一句/兩句歌詞?
長腳叔叔你好嗎?交出溫馨的心是你嗎?〈夢中天使〉
如果得獎,你有咩嘢想講?
無論你哋支唔支持我都好,我都會多謝你哋, 因為我豁達,所以我原諒你哋唔豁達!多謝!
自我介紹:
我係程文政,Kevin Cheng,係一名藝人、歌手、作曲人、填詞人、主持、司議、演員,仲有我係一個無聊嘅瘋子!
點解要聽你首歌?
〈快樂頌〉係我同古典鋼琴好手陳偉民嘅作品,古典樂配合流行曲創作,以人類最原始對音樂嘅需求,即係抒發內心嘅快樂情緒為題材。人生最重要及時行樂,人人齊聽〈快樂頌〉。
除咗唱歌,仲有乜嘢叻?
我最叻係唱〈我至叻〉,因為我餐餐都做阿Head!最勁係打畀何家勁,一齊行自然教育徑。
個人金句/座右銘?
玩其實是最真實、最自己的。任何事情抱著玩樂的心,會做得更自然。
最喜愛嘅一句/兩句歌詞?
la la la la la la la la la……〈火熱動感LaLaLa〉
如果得獎,你有咩嘢想講?
多謝陳偉民、多謝貝多芬、多謝莫札特、多謝舒伯特同巴哈,仲有多謝顧家輝同黃霑。最後多謝最重要嘅三個人,方進新、方展博同股神葉天。
留言