Chris Brown喺台上除衫展示紋身。
雖然演唱會延遲咗四個鐘先開始,但仍然無損粉絲嘅熱情。
經常惹上麻煩嘅美國Hip Hop男歌手Chris Brown,早前喺菲律賓馬尼拉開騷,點知離境嘅時候被當地入境處扣查!原因主要係佢去年原定除夕夜喺菲律賓演出倒數跨年派對,但喺臨行前一天卻以遺失護照為理由取消行程,事後一直無退回演出酬勞,所以被有關當局以欺詐罪名扣留。經過一輪斡旋之後,Chris Brown最終都順利出境嚟到澳門,點知演出嗰時又撞正查牌,真係夠晒黑仔!
雖然前晚澳門演唱會延遲咗四個鐘先開始,但仍然無損粉絲嘅熱情。身穿牛仔外套嘅Chris全晚表現興奮,除咗喺台上除衫展示紋身,仲唱出前女友Rihanna嘅新歌〈Bitch better have my money〉,掀起全場高潮。不過黑仔嘅佢,喺演唱會開始咗唔夠一個鐘,就突然有近半百澳門警察現身查牌,令到演出暫停。雖然一度引起鼓譟,但粉絲都非常合作,令到演唱會喺查牌過後順利繼續進行。事後,ChrisBrown仲喺Instagram多謝樂迷支持。
留言