城規會審議漁人碼頭新規劃草案當日，有民到工務局抗議。

從官網圖片可見「南灣海岸」一直從南灣湖D2延伸至D5地段，但該區2幅公家批並未批出，信德預計該住宅項目建築面積超過400萬平方呎。
特首崔世安去年高票連任後，的確為政府帶來一番新氣象，令人刮目相看。先是大膽起用在歐案作供時「扮失憶」的前工務局副局長李燦烽班師回朝，重掌帥印，開公職人員錄用風氣之先，品德操守都可以掉埋一邊。
新班底果然無令市民失望，換屆短短八個月，高潮浪接浪。放高「漁頭」賣大包，仲要送埋容積率和地積比，真係識為發展商著想；放生16幅閒置地，承批公司長年囤積土地唔發展，多次轉手無本生利賺幾億，回歸15年特區政府首次第一時間跪低話自己錯，孺子可教！人貴坦誠，官員早預言「放生」陸續有黎，乃真陽光政府典範。
新城諮詢藏頭露尾搞到一鑊粥，旅遊文化設施偷換豪宅，為南灣湖CD區放高暗暗開路，焚化爐係社區隔離有咩問題？交通系統未規劃好有咩問題？望唔到主教山有咩問題？擺明假諮詢有咩問題？硬銷方案的代副局張潤民兩脥插刀、赤膊上陣，在公聽會上臉不改容，越戰越勇，即刻升職坐正，咁咪叫賞罰分明！
另一邊廂，新《土地法》(第44條) 藥力生效，凡到期未起好、未發入伙紙，未在25年期限內轉為確定性批給的批租地都要收返。4月新運輸工務司果真依法辦事，收回青洲一塊未開發的工業用地 (當然只係地碎) ，仲趕緊尾班車嘅發展商大驚！官委議員、御用護法率先跳出來在立法會上喊話：好大一個法律漏洞，要修法！
地產業界場外齊聲和應，為將在年底到期的5千樓花單位呼冤，為唔知係邊嘅小業主哀鳴。直選議員麥瑞權義憤填膺：政府收番變爛尾樓，迫建商破產，工人有汗出無糧出，隨時要上街！影響社會和諧繁榮穩定，政府放生發展商等於放過自己！
神機妙算要數漁人碼頭和信德，一個未卜先知工務局實會放水，批准酒店放高到90米，早早在上市公司年報向股民報喜；一個係政府大債主，未批地幾年前已經賣定巨型樓盤廣告。有投資眼光自然贏在起跑線，當年用5億向蕭德雄買入益隆爆竹廠地債，換走美高梅、壹號湖畔地皇已經贏番利息，剩番大拿拿八萬幾平方米，慢慢同政府計。按番當年樓地板(建築面積) 一呎換一呎，可能俾埋成個新城B區都唔夠。欠債還錢天經定義！就算政府第二時諗住擺平班阻住發展又嗌無樓住嘅丟民，唔搞主教山，將政法區同豪宅「東西互換」都唔使憂，遮左美高梅唔緊要，反正無敵大海景都係自己賺番。
不過講到「三放」，當年建築界翻雲覆雨點石成金嘅林偉真係無得輸，足足贏漁頭成條街。林偉用兩個複式單位加個車位已經氹到歐文龍連續三次破例，將南灣湖C7地段個盤加高成百米，以而家樓價至少賺多百幾億，連當年主控官係庭上都話呢個係「回歸後破天荒的首例」。歐文龍係咪真係讀理科出身？人地以小搏大，佢就以大搏小，數真係唔係咁計。
隨著無形之手操控起舞，歐文龍真係一個絕世「超高魔術師」，一對魔術手街影話廢就廢，超高樓要幾高有幾高，明明得2、30都可以加到百四。合併地皮先至最神，人地割街開路，佢割埋條馬路送俾人，南灣湖C區發水奇蹟有版你睇。
歐文龍時代留下既「土地乾坤大挪移」大法至今依然廣傳，按「需求」重新組合，符合「發展(商)最大效益」。06年那些濕了水、樓地板發脹好幾倍的街線圖已經失效，但那些多年來原封不動的圍板，連未批出的公地也可以堂而皇之的圍封起來，無人過問，便是南灣湖超高樓、發水樓可能再現的最佳佐證。