田馥甄表示自己只係想同歌迷玩下互動,無諗過會惹嚟是非。
田馥甄喺個唱上拎Madonna作比較,引嚟對方嘅歌迷不滿。
臺灣歌手田馥甄(Hebe),日前喺高雄舉辦「如果」巡迴演唱會。現場同歌迷互動時,佢就講笑話:「我們也有延伸臺,不用三萬臺幣(約澳門幣7,400元),大家知道我在說甚麼嗎?我們物美價廉,不像麥當娜(Madonna)。」點知佢嘅戲言,即時引嚟Madonna歌迷嘅不滿,紛紛去佢嘅Facebook專頁炮轟,話佢「自抬身價」同國際級天后相比。不過,亦有唔少Hebe嘅粉絲為偶像平反,掀起雙方歌迷嘅罵戰。
喺演唱會上,Hebe拎國際級天后Madonna開玩笑之後,雖然已經強調:「好啦!我知道和她不一樣。」自嘲自己無得同Madonna比。不過,唔少Madonna嘅歌迷護主心切,狠批Hebe:「她算哪根蔥?」事後,Hebe表示自己都好想睇Madonna明年2月嘅臺北演唱會,仲已經鎖定睇演出嘅最佳位置。佢話:「我這次的巡演已經十場,對表演的內容已經相當熟悉,所以想和歌迷玩下互動,沒想過會惹來是非。」
留言