麥浚龍坦言要莫文蔚同謝安琪一齊參與,先會落實拍攝。
麥浚龍話有投資者想將歌曲〈念念不忘〉拍成電影版。
麥浚龍(Juno)早前推出嘅新歌〈念念不忘〉同〈羅生門〉,同2004年推出嘅〈耿耿於懷〉構成愛情故事三部曲,引嚟網民嘅熱烈討論。噚日,Juno出席活動嗰時,就話有投資者想將歌曲〈念念不忘〉拍成電影版,而Juno自己都好有興趣,但如果真係實行,就要睇返有份「聲演」嘅莫文蔚同謝安琪可唔可以參與。
噚日,Juno喺灣仔出席音樂會記者會,講到早前佢推出嘅新碟反應熱烈,特別版都賣到斷市,Juno就話有人提議佢乘勝追擊,快啲喺紅館開演唱會。不過,佢話自己明年要執導一套關於毒品嘅警匪片,最快要到2017年先有時間開個唱。Juno仲大爆有投資者希望將早前推出嘅新歌〈念念不忘〉拍成電影版,佢話:「我覺得可以實行嘅,但係就要睇返莫文蔚同謝安琪,佢哋OK我就冇問題。」
留言