車仔無藥可救?
英超又踢完一輪比賽,唔經唔覺差唔多踢咗三分一賽程。上季冠軍車路士繼續沉淪,○比一輸畀史篤城後,聯賽已經三連敗。球隊搞到要在榜尾位置掙扎,除升班馬般尼茅夫同三支踢極都冇起色嘅維拉、新特蘭及紐卡素外,車仔真係差到冇朋友。老摩是否難辭其咎?睇怕都要搵定後路。
車仔搞到如此地步,肯定內部有唔少問題出現。首先將帥不和,傳出有部分球員對老摩不滿,甚至用落到場嘅比賽態度宣洩不滿,導致球隊戰績大跌。空穴來風必有因,似乎有意搞到老摩冇得撈。
其次就係領導層方面,已經對老摩失去耐性。雖然曾經表示球會唔會解僱他,但相信命不久矣,因為英超一向都係最現實,交唔到成績邊個都要落台。其實老摩嘅領導能力毋庸置疑,十年間攞過六次頂級聯賽冠軍,肯定係最成功領隊之一。講真一句,如果老摩真係離隊,車仔就有得救?球隊即時可以重上軌道?球會又搵邊個可以頂替到老摩位置?不如再給他多啲時間吧。
足球評述員 Ben
留言