李亞鵬現身劉嘉玲為好友胡軍兒子康康舉辦嘅「上契」派對。
由男友人扶實嘅李亞鵬嘔極都嘔唔出,表情非常痛苦。
向來人緣甚廣嘅劉嘉玲,日前喺中環一間餐廳為好友胡軍兒子康康舉辦「上契」派對,宴請林青霞、張叔平及王菲前夫李亞鵬等好友見證。至凌晨約12時,林青霞先同男友人及司機離開,張叔平則緊隨其後。隨後,劉嘉玲與大家逐一擁抱,最後同契仔康康錫錫後離開。而胡軍則有意送飲大兩杯嘅李亞鵬返酒店,但李亞鵬就堅持要坐自己嘅車走。
腳步浮浮嘅李亞鵬由男友人扶上車後,去到上環一條巷仔時突然停低,男友人扶實李亞鵬落車,李亞鵬按住心口想嘔,但就嘔極都嘔唔出,表情非常痛苦,其後兩人返回車廂。約五分鐘後,男友人又再扶佢落車,豈料大醉嘅李亞鵬突然掌摑咗男友人一下,現場更清楚聽到「啪」一聲巨響,男友人即時呆咗,之後仲發生拉扯,搞咗一輪又再上返車,好彩最後都成功返到酒店。
留言