場上鬥至場下好過睇戲
第六十二屆澳門格蘭披治大賽車終於到正式比賽,一衆車迷又有一連串精彩賽事可以欣賞;市民除了可以安坐家中睇直播,亦有不少車迷選擇到現場,聽住引擎聲睇比賽,不過感受大賽車氣氛之餘,市民亦要記得留意天氣變化,做足防曬措施,並預防天氣可能時晴時雨,咁就自然睇得開心啦。
說回今屆賽事,雖然WTCC世界房車錦標賽今年未有落戶澳門,名將伊雲梅拿等亦沒有參賽今屆房車賽,車迷難免有所失望,但兩場名牌賽事GT賽及三級方程式賽,亦有足夠睇頭。雖然GT賽速度感未及三級方程式,但話題性分分鐘比三級方程式更高,單以去年賽事的火藥味,已足以令今屆賽事更具吸引力。
其中意大利名將莫他拿一直都是車迷的寵兒,在車場範圍內,更是一衆記者及工作人員“指定集郵對象”。在第六十屆賽事中,莫他拿竟然藝高人膽大,選擇在嶺南彎爬頭,技驚四座,亦成為一衆車迷茶餘飯後的話題。可惜去年排頭位出賽,卻被晏高及雲迪辛特爬過得第三,賽後莫他拿失望之餘又不滿,訪問途中言語間又與晏高針鋒相對,賽車場上場下都火藥味十足,好過睇戲。
今屆賽事首日練習賽,莫他拿成績未算突出,到排位賽雖然有晏高及雲迪辛特相繼退出,缺少兩大勁敵,以為可以獨領風騷,豈知又突然殺出一個穆克,最後一刻搶得首位,難怪莫他拿賽後又再次“面燶燶”。
一衆車迷就即管拭目以待,睇下這位“賽車界男神”能否在福地東望洋賽道再次封王。
賈大廚
留言