梅媽前言不對後語

    “香港女兒”梅艷芳逾千件遺物網上拍賣，包括內衣褲。有心人痛哭，狂呼“侮辱”。有消息指，內衣褲全新的，價目牌也未拆。旣未用過，怎算阿梅的貼身內衣褲？與路過女人街，隨手掃幾件有何分別！

    酒廊掌摑事件後，護花浪跡天涯的林國斌說：“呢單嘢眞係，根本唔係人所為。我與曾志偉一班朋友，希望可以Stop咗佢，如果唔得，就會出錢買返晒的奬座同內衣褲。”林國斌直斥遺產信託基金好過分：“好似抄家咁，難聽啲講句，假如我爭你錢，唔通你又攞埋我老婆啲內衣褲出來賣咩。”

    俗語講：“底褲都賣埋。”到清倉地步了：“阿梅走咗十幾年，信託基金的事，我一向都唔理。但我哋希望Stop咗佢，或者夾錢買返啲嘢，但又唔可以叫人唔Bid。始終呢啲係私人物品，等大家睇到呢個社會幾咁醜惡，眞係唔知邊個諗出來，我想講粗口。”

    公開網上拍賣，“冇理由叫人唔Bid”；“梅媽”覃美金老淚縱橫，哀求各位“不要抬價，不要Bid。”她向媒體哭訴，誓要投得阿梅生前的內衣褲、登台的Bar Top、新秀冠軍及金像奬“最佳女配角”之奬座。梅媽強調：“阿梅的遺物，我一件都冇，今次一定要買返晒……”老人情詞懇切：“各位唔好同我搶，我連阿梅膠碟一張都沒有。唔好理我百年歸老怎樣處理，總之，我現在就要競投。”家用、旅行、醫藥、打官司，梅媽經常呻窮，標投女兒遺物，錢從可來？“我冇儲蓄，銀行幫我畀……”梅媽答得爽朗，“最多扣埋我啲糧（每月三萬元生活費），總之我一定要買到，我會叫我大孫幫我去投。所以，唔該各位歌迷唔好同我搶。”惻隱之心，人皆有之，為了一條內褲，一具奬座，難道忍心讓老人家冇飯食？阿梅做鬼都唔肯放過你。

    梅媽眼睜睜講大話！十秒內前言不對後語。前言“阿梅遺物，我一件都冇。”後語嗚咽：“你知唔知，我屋企有間房，專係放阿梅初入行登台着過的衫與飾物，還有篋同櫳，都有二十幾個。日日開住冷氣，單是冷氣費都幾千元。呢啲邊個知……”啊，眞係畀梅媽玩死，“阿梅遺物，我一件都冇”，是眞的。冇一件，但有“一個倉”。仍未止，“同埋阿梅細個啲衫，家姐（梅愛芳）啲衫，都放埋一齊，擺喺間房。所以，各位唔好同我搶……”拍賣阿梅內衣褲，侮辱麼？假如外披歌衫，供奉展覽廳中，才是“徹底尊重”。應建紀念館，遺物可保存久遠，收費養慈親……發夢都畀啩。

    高 梁