兩巨頭隨時絕跡球壇
球壇新聞真係日日新鮮,前日又有兩大勁爆消息,可以話震撼世界足壇。
首先係國際足聯的道德委員會宣佈,現任國際足聯主席白禮達及歐洲足協主席柏天尼,被禁足球壇八年,並且即時生效。
白禮達已經接近八十歲,仲要禁“足”八年,睇怕今次禁令,白禮達應該可以疊埋心水“養老”。
至於柏天尼因誠信問題及濫用國際足聯副主席職權等罪名而被罰,相信一向孤高自傲嘅柏天尼亦唔會八年後又一條好漢,再次踏足球圈。即係話呢兩位世界足壇巨頭,將會絕跡球壇。且一單還一單,貪污事件仍未告一段落,可能仲有手尾跟。
第二單猛料,就係邊個出任車路士下季新教頭又有峰迴路轉的消息爆出。現任曼城領隊柏歷連尼將會過檔教“車”,信不信由你,機會率高達八成,空穴來風必有因。總之,下季英超教頭隨時大執位,仲有其他風都吹得好勁,例如摩連奴教曼聯,哥迪奧拿教曼城。所以話,英超的確好睇過戲,齋睇各隊教頭點樣各師各法,鬥扭六壬都已經夠晒吸引力。
足球評述員Ben
留言