神奇的李城
英超經已踢咗十七輪比賽,聖誕冠軍係李斯特城,相信冇乜球迷可以估到呢班“狐狸幫”竟然會咁有韌力,可以撼低各大豪門,站穩榜首位置。
到底呢支球隊有乜咁神奇?不妨又同大家剖析一下。講球員身價,成隊波加埋,與曼城及車路士相比,真係蚊髀同牛髀,但估唔到踢出嚟嘅效果堅到不得了,“雙藍”都要行埋一邊。球隊表現咁神勇,最大原因就係球隊上下一心,團結就是力量,球員又拼勁十足,話知你勁旅抑或弱隊,總之遇神殺神。當然士氣最緊要。“狐狸幫”開季開得好係最關鍵,近十場聯賽更加保持不敗,呢個勢頭實在係最大強心針。尤其兩位射手華迪與馬列斯,入波入到雄心萬丈。
雲尼亞里雖然唔稱得上乜嘢戰術大師,但講到執教經驗,絕對唔輸蝕得比目前任何一位名牌教頭,至少令到班球員貼貼服服、聽教聽話,激勵到整體鬥心。真係唔明,最近幾家富豪大球會,又話要搵邊個、邊個頂級教頭,點解又唔考慮吓雲尼亞里?起碼佢能將一支平庸球隊帶到咁“靚仔”,起碼有幾道板斧。
足球評述員Ben
留言